Questa mia zirudella è dedicata ai giovani degli anni 60, quelli che cercavano disperatamente l’amore in spiaggia… nelle roventi estati riminesi di quei dolcissimi anni mai dimenticati …io penso che molti di voi si ritroveranno come d’incanto proiettati in quei sogni irripetibili …
” Dó pataca ”
E prim dé dn’insteda fà,
a sn’amig che sta in zità,
ém decis d’andé a mareina
per truvé dla paserèina.
L’éra agost s’amarcord bèin
e uiéra un bel garbèin,
tôt la zènta sbóta a tl’aqua
a sciaques cumè i pataca,
cul e penzi e cellulite,
gambi storti, bógn e artrite,
tenta e tenta ad cla carnaźa,
senza gnenca na ragaza.
Doni megri s’un sach d’osi,
ma anche ad queli propi grosi:
un pareva cridim pó,
che un gni fòs la gioventó.
I’éra vècc dna certa età,
guasi tôt pió dla che ad quà…
Chi curiva drì ma l’onda,
chi che steva a sla sponda,
chi ciapeva agl’ondi ad cul
e pó e feva un sach ad dul,
anche quei che sa curag,
dop vés fat un bel masag,
i s’butèva pién pianin,
cum chi fà i burdel źnin,
quan ch’impera ad caminè,
ancor prima da parlè.
E mi amig che véd piò bein,
u m’ha fat sóbti un segn,
“Guerda, guerda ilasó,
drì cla tenda rośa e bló,
uié dò che sgonda mè,
a gl’aspeta mu mè e té !”
“A se , se, um per davera,
che al zirca l’aventura …”
E fasénd e pas da ból,
sa cla sbanzla cumé i pól,
dop vés dèd na gran pitneda,
andem drét versa la méta.
Cum cav giva cal burdeli,
li m’pareva do sureli,
a gl’aveva se e nà,
piò o mench la nosta età,
sól che una l’éra bèla,
ma per gnint la su surela.
Mè a m’avsein ma la piò bróta,
perché a pèns “La m’darà reta!”
ma te fei na mòsa ad źnòç,
un ent pò mè a m’invróç,
perché uiéra un burdel źnin,
che zugheva s’un badlin,
cl’éva fat na buša tonda,
che la n’éra isé prufonda,
ma s’un pì c’ho mes in fal,
a sò casch cumé un caval,
quant cl’inzempa pora ló,
e u s’arugla sóbti zó,
“ Ho cla m’scusa mi sgnureina,
a si arvati sta mateina ?”
a iho dét sóbti a raź,
per putè pó rómp e giaź,
ma cal do sla boca vèrta,
al ridiva da una perta,
“ Forza andema femsi sòta,
cu ié chés da dei la bòta…”
E mi amig santénd di isé,
u s’é sóbti de da fè,
e l’ha cminź a dei vanela,
ma cla bionda la piò bela,
mentre mè vidénd ma cl’elta,
am sò volt da un enta perta,
lia pureina us capiva,
che da dreinta la pativa,
per furtuna dop la bela,
che ut s-ciupes la curadela,
la m’ha fat boca da rid,
patrucénd ma tera i pid,
e mè alóra ho ciap curag,
mentre e mi amig, e gag,
um spingeza da di drì,
per butèm ados ma lì,
na ma lia, quela bela,
ma cla bróta, la surela,
ma at cla sabia cla scuteva,
sòta e sól che u t’infugheva,
a iho dét tôt a t’un fiè,
“ A sém mnù finenta i què,
mè e ló e mi cumper,
sólament per fèv piasér,
e vrésme sa vulì,
fev un pò ad cumpagnì,
e putè se an vi dem dan,
andé speśa chi capan,
per fè un pò ad conoscenza,
fè do ciacri ad circusteza,
e se tôt dop l’andrà lés,
as putrésmi anche dè un bés:
us capés, snò un basin,
perché an sém di birichin !”
Ma cal do ilé daventi,
l’in capiva un acidenti,
li s’guardeva l’una sl’elta,
arvultendsi da na pèrta,
e pó dop na mezureta,
ad susór e senza freta,
la piò bróta, cla struvlida,
sa cla faza da invurnida,
lai s’avseina me mi amig,
che um pareva ste in castig,
perchè u s’era źirè ad schina,
drì ad mè cla bróta us-cina,
e guardendii a tla faźa,
la i’ariva sla manaźa,
un s-ciafon travers di dint,
cl’ha iha tòlt i sentimint,
e pó dop la vin da mè,
che am s’éra trat piò indré
e arbufendsi sò i calzun,
la m’da ad źnoç a ti marun…
Pora nun ach figurazi,
a ém fat scal do ragazi,
tôt i dó pori quajun,
sénz fès veda da nisun,
via ad cursa speśa i sdrai,
che a femmi tôt dó i sprai,
e tra mocli e aźidint,
avém curs per n’ora e vint,
e pó dop ad la dla fośa,
as sem stés cumè i balóša,
e s’un fil ad vóša straca,
as sém dét: “ Ach dó pataca !!!”
Luciano Monti
